Rasim Abutalıbov

Biznesin İdarəedilməsi sahəsində dosent və fəlsəfə doktoru olan mütəxəssisimiz 20 ildən artıq biznesin əsasları, menecment, biznes əlaqələri mövzularında tədris təcrübəsinə malikdir və 2008-ci ildən günümüzədək fəaliyyət göstərən “AZ marketing” MMC şirkətinin təsisçisi və direktorudur. Mütəxəssimiz müxtəlif vaxtlarda “Buta Trade” MMC şirkətində direktor və icraçı direktor, Bakı Özəl Türk Liseyində ictimaiyyətlə əlaqələr meneceri, Qafqaz Universitetində Biznesin İdarəedilməsi kafedrasının dosenti, fəlsəfə doktoru, baş müəllim vəzifələrini icra etmişdir. Təhsilinə Azərbaycan Dövlət Universitetinin menecment fakültəsində başlayan Rasim Abutalıbov sonradan həmin fakültənin magistr pilləsinə qəbul olmuşdur. Azərbaycan Milli Elmlər Akademiyasının strukturuna daxil olan İqtisadiyyat İnstitutunda fəlsəfə elmləri doktoru adını almışdır. Bundan əlavə Erasmus Mundus proqramı çərçivəsində Polşanın Varşava Həyat Elmləri Universitetində postdoktoral tədqiqatçı qismində çalışmış, Çexiya Respublikasının Masarik Universitetində təhsil almışdır. Ölkə daxilində və xaricində nəşr edilmiş 20-yə yaxın məqalənin, 10-na yaxın monoqrafiyanın və kitabın müəllifi olan mütəxəssimiz hal-hazırda Tələbə Qəbulu üzrə Dövlət Komissiyasının və Azərbaycan Respublikasının Prezidenti yanında Dövlət Qulluğu Məsələləri üzrə Komissiyasının eksperti, Gömrük Akademiyasının, Azərbaycan Dövlət İqtisad Universitetində Sabah qruplarında baş müəllim və Bakı Mühəndislik Universitetində Biznesin İdarəedilməsi fakültəsinin dosenti, fəlsəfə elmələri doktoru və baş müəllimidir. O, həmçinin Londonda yerləşən Beynəlxalq İdarəetmə Araşdırmaları Assosiasiyasının (IMRA) və Ağdəniz Universitetində akademik jurnalın Rəyçilər qrupunun üzvü, Çin-ABŞ Biznes İcmalı və Çin Biznes İcmalının Redaksiya Şurasının və "Annals of Marketing Management & Economics” jurnalının redaksiya heyətinin üzvü və Azərbaycan Reklamçılar İttifaqının Vitse-Prezidentidir.